Во Собранието на Република Македонија денеска седници ќе одржат комисиите за одбрана и безбедност, за економски прашања, за еднакви можности на жените и мажите, за транспорт, врски и екологија, Законодавно-правната комисија, за прашања на изборите и именувањата и за надворешна политика.
Предлог – законите за дополнување на Законот за служба во Армијата на Република Македонија, на Законот за полиција, на Законот за внатрешни работи и на Законот за внатрешни работи, сите во прво читање, се на дневниот ред на седницата на Комисијата за одбрана и безбедност.
Комисијата за економски прашања ќе расправа по предлог-законите за дополнување на Законот за техничката инспекција, на Законот за Државен пазарен инспекторат и на Законот за концесии и јавно приватно партнерство, сите во второ читање.
Предлог – закон за изменување и дополнување на Законот за превенција, спречување и заштита од семејно насилство, во прво читање, е единствената точка на седницата на Комисијата за еднакви можности на жените и мажите.
Членовите на Комисијата за транспорт, врски и екологија на денешната седница ќе дискутираат за повеќе предлог-закони за изменување и дополнување, меѓу кои на Законот за животната средина, на Законот за градење, на Законот за комуналните дејности, како и на Законот за просторно и урбанистичко планирање и на Законот за електронските комуникации.
На агендата на Законодавно-правната комисија се повеќе точки меѓу кои предлог-законите за изменување и дополнување на Законот за превоз во патниот сообраќај, на Законот за јавните патишта на Законот за комуналните дејности, како и на Законот за внатрешни работи, на Законот за извршување на санкциите и на Законот за Државниот инспекторат за земјоделство.
На седницата на Комисијата за прашања на изборите и именувањата ќе се разгледуваат предлог-одлуките за разрешување и именување на претседател и членови на Одборот за доделување на државната награда „ 23 Октомври” и за член на Одборот за доделување на државната награда „Мајка Тереза”.
На седницата на Комисијата за надворешна политика ќе се расправа по Предлог – законот за ратификација на Меморандумот за разбирање за институционалната рамка на Иницијативата за превенција и подготвеност во случај на катастрофи на Југоисточна Европа.
Пред членовите на комисијата отчетно обраќање ќе има и амбасадорот Сашко Стефков за вршењето на должноста Шеф на Канцеларијата за врски на Република Македонија во Атина.