Бугарскиот суд денеска одобри екстрадиција на Французинот кој призна дека ги познавал напаѓачите на францускиот сатиричен неделник „Шарли ебдо“, но негира дека е исламски екстремист.
Фриц-Жоли Жоакин (29), кој го има прифатено исламот, уапсен е на 1. јануари додека се обидувал да ја премине бугарско-турската граница. Тој на денешното судење во градот Хасково изјави дека е невин и оти сака да се врати во Франција.
Жоакин, по потекло од Хаити, призна дека долго се познава со браќата Куаши, кои ја нападнаа редакцијата на „Шарли ебдо“ во Париз на 7. јануари при што убија 12 луѓе. Но, Жоакин негираше дека ги знаел нивните планови за терористичкиот напад.