Босанскиот премиер во оставка Вјекослав Беванда изјави дека Кина и доделила грант од осум милиони долари на Босна и Херцеговина за различни проекти.
Беванда тоа го соопшти на прес-конференција по билатералните средби во Белград со премиерите на Србија и на Кина, Александар Вучиќ и Ли Кечијанг. На средбите се разговарало за економската соработка и можностите за реализација на регионални проекти.
Премиерот на БиХ се заблагодари за кинеската помош во справувањето со последиците од поплавите што ја зафатија земјата во пролетта. Тој истакна дека и Кина покажала интерес за различни регионални проекти, меѓу кои и модернизација на железничката линија Белград – Сараево.
Беванда и Кечијанг разговарале и за евентуални кинески инвестиции во земјоделството, дрвната индустрија и енергетскиот сектор.
Во Белград денеска почна Третиот самит на Народна Република Кина и 16 земји од Централна и Источна Европа под мотот „Нов мотор, нова сила, нова платформа“.