Милан Кундера и Љубивоје Ршумовиќ се првите лауреати кои ќе ја добијат наградата „Табернакул“, односно скулптура и 5.000 евра.
Добитниците на наградите ги избра комисијата во состав од Ферид Мухиќ, Горан Стефановски и Венко Андоновски, првите членови на академијата „Табернакул“.
Наградата за досега најдобро необјавено дело на македонски јазик подразбира и објавување на делото, па во подготовка за печатење се есеите „Завеса“ и „Средба“ од Кундера и „Буквар на детски права“ од Ршумовиќ.
Доделувањето на наградата се планира за декември годинава, а лауреатите стануваат членови на академијата.
„Оваа награда е најмалку забава, најмалку релаксација и разонода. Таа е обид за поставување на уште една реперна точка на македонската културна мапа. Таа е уште еден обид да се влијае на формирање на вкусот на консументот, а градењето на тој вкус е првиот чекор кон ориентирана и критична единка, напор да не се заглиби во матната тиња на либералниот капитализам и неговата средишна цел – профитот“, велат од издавачката куќа.
Покровител на наградата, освен „Табернакул“ е Премиерот на Република Македонија, Никола Груевски, и Комерцијална банка.