Русија двојно ќе ја зголеми помошта за Абхазија во споредба со минатата година, изјави денеска рускиот претседател Владимир Путин на средбата со абхаскиот претседател Раул Хаџимбом.
– Нашите експерти, членови на собранијата заклучија дека е неопходно да се усвојат дополнителни акти, за да се формираат најдобри услови за развој и економски односи и да се обезебди безбедност на Абхазија и да се реши главната задача – подобрување на животот на луѓето, истакна Путин.
Претходно, Кремљ најави дека Русија и Абхазија ќе потпишат 10-годишен договор за сојузништво и стратешко партнерство. Договорот ќе придонесе за зајакнување на меѓународните врски со Абхазија, како и дека евентуален вооружен напад врз една земја ќе се смета за агресија и на другата држава.
Договорот предвидува и модернизација на армијата на Абхазија и дополнително ќе го финасира зголемувањето на платите на вработените во здравството, во образованието, во културата, во спортот и во социјалните служби на Абхазија.
Претседателот на Грузија, Георгиј Маргвелашвили договорот го оцени како апсурден и нелогичен, додавајќи дека заштиата на Абхазија и на Осетија е можна само во границите на единствена Грузија.
Русија повикувајќи се на изјаснувањето на абхаското и јужноосетиското население во август 2008 година, ја призна независноста на отцепените грузиски автономни области, а тоа го направија и Венецуела, Никарагва и Науру.