Генералниот секретар на Организацијата за безбедност и соработка во Европа (ОБСЕ), Ламберто Заниер изјави во Њујорк дека ОБСЕ планира да го зголеми бројот на своите набљудувачи во Украина за повеќе од шест пати.
– Навистина сакаме доколку е можно да придонесеме за стабилизирање на примирјето и за намалување на кризата. Соработниците на ОБСЕ во зоната на конфликтот ќе станат 500, рече Заниер. Во Украина во моментов се наоѓаат 80 набљудувачи на ОБСЕ.
Заниер истакна дека примирјето во целина се почитува и додаде дека ОБСЕ најостро ги осудува обидите за негово нарушување.
– Не е во ред примирјето да се користи од некоја од страните за добивање на воена предност, бидејќи тоа може да доведе до уривање на се што досега е постигнато, изјави тој.
Заниер во Њујорк се сретна со генералниот секретар на Обединетите нации Бан Ки-мун, со кого разговараше за мирното решевање на украинскиот конфликт.