Украинската Влада денеска соопшти дека Русија распоредила околу 4.000 војници на полуостровот Крим, на границата со Украина.
– Според информациите со кои располагаме, речиси сите воени единици на Руската Федерација се стационирани во северниот дел на окупираниот Крим. Префрлени се на административната граница со Украина, а исто така и опремата и муницијата, изјави портпаролот на украинскиот Национален совет за безбедност и одбрана, Андриј Лисенко.
Рускиот министер за одбрана, Сергеј Шојгу пред два дена истакна дека поради влошувањето на ситуацијата во Украина и зајакнатото воено присуство во близина на руската граница, ќе ги модификува активностите на командата на Јужниот воен округ, а еден од приоритетите на командата ќе биде распоредување „на комплетна воена групација во правец на Крим“.