Киев нема да му дозволи пристап на рускиот конвој со хуманитарна помош наменета за источна Украина на украинска територија, изјави портпаролот на украинскиот Совет за национална безбедност и одбрана, Андриј Лисенко.
Тој нагласи дека конвојот не добил сертификат од Меѓународниот комитет на Црвениот крст за да може да тргне за Украина.
Во конвојот има 280 руски камиони. Тие се упатиле кон Украина рано денеска, откако е постигната согласност за меѓународна хуманитарна мисија во источниот дел на земјата.
Црвениот крст, кој треба да ги координира активностите, сепак изјави дека нема информации што превезуваат камионите и во кој правец се движат.
Во меѓувреме заменик-началникот на администрацијата на украинскиот претседател Петро Порошенко, Андриј Чалиј изјави дека кога руската хуманитарна помош ќе стигне до границата со Украина, таа ќе биде префрлена од претставници на Црвениот крст од руските камиони во други превозни средства.