Во организација на Академијата за судии и јавни обвинители „Павел Шатев”, а во соработка со АIRE Центарот од Лондон, денеска ќе се одржи национална промоција на Регионалната дата база на судската пракса на Европскиот суд за човекови права релевантна за државите од Југоисточна Европа.
Воведни обраќања на промоцијата ќе имаат министерот за правда Аднан Јашари, директорката на Академијата за судии и јавни обвинители „Павел Шатев“ Анета Арнаудовска, програмскиот менаџер на Програмата за владеење на правото во Западниот Балкан, AIRE Центарoт од Лондон, Билјана Брејтвејт и вршителот на должност во Британската амбасада во Скопје, Кристин Винтербурн.
На промоцијата излагања за актуелните предизвици во спроведувањето на Европската конвенција за човекови права во Република Македонија ќе имаат д-р Мирјана Лазарова-Трајковска, судија на Европскиот суд за човекови права и Костадин Богданов, директор на Бирото за застапување на Република Македонија пред Европскиот суд за човекови права.
Регионалната дата базата пред присутните ќа ја презентираат Билјана Брејтвејт, програмски менаџер на Програмата за владеење на правото во Западниот Балкан, АИРЕ Центарот од Лондон и Велимир Деловски, регионален проектен координатор за Македонија.
Промоцијата е резултат на соработката помеѓу Академијата за судии и јавни обвинители и AIRE Центарот од Лондон – организација која повеќе од 25 години работи посветено во областа на промоцијата и заштитата на човековите права, а во рамките на Проектот за владеење на правото во Западен Балкан, кој е поддржан од Министерството за надворешни работи на Обединетото Кралство и Британската амбасада во Скопје.