ЕУ и Украина се договорија за разработка на заеднички „план за раст и обнова на Украина за периодот 2014-2016 година“, а за таа цел во земјата ќе пристигне експертска мисија на Унијата.
Ова се наведува во финалното коминике на денеска завршената координациска средба на донаторите, посветена на подготовката за есенската конференција за собирање странска помош за Украина, пренесе ИТАР-ТАСС.
На денешната средба не беа определени конкретни суми дополнителна помош за земјата.
На средбата учествуваа претставници на Европската комисија, на земјите членки, како и на САД, Канада, Јапонија и други потенцијални донатори. Претставени беа и ММФ, Европската банка за обнова и развој (ЕБОР), Европската инвестициска банка (ЕИБ), Програмата на ОН за развој и неколку хуманитарни организации.
На 5 март ЕК утврди програма за економска помош за Украина во вкупен износ од 11 милијарди евра, од кои 1,61 милијарди евра се стабилизациска макрофинансиска помош. ЕУ вети и дека дополнително ќе оддели 1,5 милијарда евра од своите фондови за развој за периодот до 2020 година за поддршка на украинската економија.
Останатите осум милијарди евра ќе бидат доделни од ЕБОР (пет милијарди) и ЕИБ (три милијарди) за конкретни инвестициски проекти, чие спроведување ќе зависи од реалните показатели на украинската економија, како и од реформите во Украина.
Рокот за доделувањето на сумите од овој дел уште не е определен.