Министерот за образование и наука Абдилаќим Адеми денеска се сретна со сликарот Омер Калеши, кој е роден во Македонија, а живее и работи во Париз.
Како што информира Министерството за образование и наука, Адеми истакнал дека приоритет во неговата работа ќе биде продолжување на реформите во образовниот систем и дека придонесот на големите личности, како што е сликарот Калеши, се значајни за развојот на образованието и културата во Македонија.
– Двајцата соговорници дискутираа за организирање бројни ликовни изложби, како и за поддршката што може да ја даде сликарот Калеши во оваа насока, кој меѓу другото ја прифати и поканата да реализира посети по уметничките училишта за да може директно да помага во развојот на оваа област, соопшти МОН.
Министерството додава дека набргу во Македонија ќе биде отворена и галерија која ќе го носи името на сликарот Омер Калеши.
– Калеши на новоименуваниот министер за образование и наука му честиташе и му посака успех во работата, а воедно и му подари книга за неговиот личен живот и дело, од авторот Јордан Плевнеш, информира МОН.