Во источноукраинскиот град Доњецк денеска започнаа трилатерални преговори за мировниот план на претседателот на Украина, Петро Порошенко за надминување на кризата во земјата.
Како што соопшти Кабинетот на Порошенко, на средбата учествуваат претставничката на ОБСЕ во Украина, Хајди Тулиавини, вонредниот и ополномоштен амбасадор на Русија во Киев, Михаил Зурабов и поранешниот украински претседател Леонид Кучма.
Според западни медиуми, на средбата присуствуваат и претставници на проруските сепаратисти од Доњецк и Луганск.
Украинскиот преседател минатата недела го објави својот мировен план и прогласи едностран прекин на огнот.
Русија го поздрави планот и ја повика Украина да започне преговори со сепаратистите во Доњецк и Луганск, кои прогласија независни држави во своите региони, ги зазедоа административните згради и влегоа во судри со украинските сили.