Двајца новинари на руската државна телевизија ВГТРК, загинаа вчера кај Луганск на исток на Украина.
Новинарот Игор Комељук (37) кој беше тешко повреден од минофрлачки оган кај приградаската населба Мими кај Луганск, им подлегна на повредите во болница, наведуваат руските агенции повикувајќи се на изјавите на главниот лекар од Првата регионална болница во Луганск, Фјодор Сољаник.
На местото на настанот загина и тонскиот техничар Антон Волошин кој беше со екипата на Комељук.
-Остатоци од телото на Волошин, беа на местото на минофрлачкиот напад, се наведува во соопштението.
Третиот член на екипата, камерманот Виктор Денисов го преживеа гранатирањето.
-Имав среќа . Една од гранатите го погоди местото каде што беа моите колеги. Успеав да ја напуштам областа – вели Денисов.
Медведев: Виновна е украинската власт
Рускиот премиер, Дмитриј Медведев на својот профил на „Фејсбук“ напиша дека за смртта на рускиот новинар Игор Комељук се виновни оние, кои себеси се нарекуваат украинска власт.
Москва бара од Киев спроведување на независна истрага по повод загинувањето на рускиот новинар Комељук, соопшти руското министерство за надворешни работи.
-Бараме од украинските власти да спроведат објективна истрага во врска со оваа трагедија и на адекватен начин да ги казнат одговорните.
– Очекуваме од светските медиуми, одлучно и објективно да ги осудат секојдневните злосторства на украинската војска – стои во соопштението, во кое се додава дека смртта на Комељукс уште еднаш убедливо покажува дека се работи за криминална структура на сили кои започнаа казнена операција на исток на Украина.
Е. Г.