Ситуацијата во Маглај во Босна и Херцеговина, каде има големи поплави е драматична, бидејќи реката Босна практично тече низ градот, а беспомошни граѓани на покриви од куќи чекаат спас, јавуваат локалните медиуми.
Водата навлегува во домовите на локалните жители кои очекуваат хеликоптери на армијата на БиХ за да ги спасат од поплавените куќи.
– Водата е над сообраќајните знаци. Автомобилите веќе не се гледаат, водата навлегува и во првите катови од зградите. Немаме струја, телефоните не работат, отсечени сме од светот…Состојбата е алармантна, изјави Мехмед Мустабашиќ, градоначалник на Маглај.
Локалните медиуми јавуваат дека „Маглај е веќе езеро над кое се се гледаат само станбени објекти“.
Министерот за внатрешни работи на РС Радислав Јовичиќ нареди ангажирање на специјалците на МВР на РС со чамци да се пробијат до жителите на Добој.
Ќе биде ангажиран и нуркачки клуб кој ќе помага во спасувачките операции во тој град.
Добој е буквално блокиран поради поплавите и поради тоа во градот е прогласена вонредна состојба.