Владата на Украина ќе почне разговори денеска за давање поголеми овластувања на регионите, според мировниот план на ОБСЕ, но на разговорите не ги повика проруските сили кои прогласија независност во два источни региона во државата.
На Тркалезната маса на национално единство ќе учествуваат в.д. претседателот и премиерот на Украина, Александар Турчинов и Арсениј Јацењук, поранешните претседатели на Украина, Леонид Кравчук и Леонид Кучма, членови на министерскиот кабинет, пратеници во Врховната рада, кандидати за претседтелски избори, раководители на обласни администрации и претставници на цивилниот сектор.
Според Гласот на Русија, на дневен ред се пет теми – уставна реформа, децентрализација на власта, борба против корупцијата и економска и хуманитарна политика.
Русија силно ги поддржува патоказите од Швајцарија како претседавач со ОБСЕ, додека Украина е прилично воздржана за тој план, за кој американски официјални претставници сметаат дека има малку изгледи да успее.
Според планот на ОБСЕ од сите страни во судирите се бара прекин на насилствата, амнестија за бунтовниците, како и отпочнување разговори за децентрализација и статусот на рускиот јазик.