Парламентарната група на Украинската демократска алијанса за реформи (УДАР) на Виталиј Кличко планира денеска да побара смена на Олександар Турчинов од функциите претседател на Врховната рада и времен претседател на Украина и на негово место да биде избран Петро Порошенко, кој е кандидат за шеф на државата на претстојните претседателски избори.
Пратеникот на УДАР, Серхиј Каплин изјави дека тоа ќе претставува историска одлука во корист на „претседателскиот кандидат со највисок рејтинг“.
– На тој начин Порошенко ќе биде ставен на тест, дали може да ја преземе земјата во сегашната форма и со соодветните предизвици, изјави Каплин.
Тој истакна дека Врховната рада би можела да го разгледа и прашањето за смена на министерот за внатрешни работи Арсениј Аваков.
Засега во украинскиот парламент со 450 места нема кворум. На седница се собираат околу 200 пратеници, а за донесување одлуки се потребни гласовите на најмалку 226 народни пратеници, наведува ИТАР-ТАСС.