Седум лица се повредени денеска при активирање на експлозивна направа на контролен пункт во близина на украинскиот црноморски пристанишен град Одеса, соопшти локалната полиција.
Како што јави ИТАР-ТАСС, жители на Одеса поставија неколку контролни пункта во околината на градот, со цел да спречат влез на проруски активисти од молдавската сепаратистичка област Придњестровје.
– Имаше експлозивна направа. Експлозијата се случи околу 4 часот изутрина на контролен пункт на локалната самоодбрана, изјави портпарол на полицијата.
Седум лица се повредени од шрапнели, меѓу кои и еден полицаец. Тие се пренесени во градската болница и се надвор од животна опасност.
Според началникот на регионалната управа на Министерството за внатрешни работи, Пјотр Луцк, како што пренесува ИТАР-ТАСС, ваквите контролни пунктови се поставени од демонстранти од Киев, кои имаат за цел дестабилизација на ситуацијата. – Поставени се 12 пунктови со нејасен правен статус, на кои во смени се распоредени над 500 лица, истакнал Луцк.
Гувернерот на Одеската област Владимир Немировски, кого го именуваа новите киевските власти, ваквите контролни пунктови ги оцени како „неопходни за контролните активности на милицијата“. Тој, сепак, признал дека во поставувањето на контролните пунктови не учествувале локални жители.