Полициски службеници од Секторот за внатрешни работи Штип, во координација со Одделот за криминалистичка полиција, СВР Скопје и Секторот за компјутерски криминал, спроведуваат акција и вршат претреси на повеќе локации во Штип и Скопје. Во фокусот на истрагата е вработен на Универзитетот „Гоце Делчев“ во Штип, кој се сомничи дека подолг временски период манипулирал со електронската евиденција на студентите.
Според првичните информации, осомничениот бил на раководна позиција во ИТ-секторот на Универзитетот, што му овозможувало пристап до електронските системи и студентската евиденција. Се истражува сомнежот дека ја злоупотребувал таа можност за неовластени измени на податоците поврзани со студирањето и исполнувањето на академските обврски. Според досегашните сознанија, постои сомнение дека преку системот овозможувал внесување бодови од испити, запишување семестри иако студентите не ги исполнувале потребните услови, како и бришење или менување на веќе внесени оценки. Наводните манипулации, според првичните информации, главно се однесувале на студенти од Турција, а осомничениот за возврат добивал паричен надомест. За случајот се вршат претреси на повеќе локации, при што полицијата собира докази и проверува дали во незаконските активности биле вклучени и други лица. При претресот во домот на осомничениот е пронајдена поголема сума пари.
Истрагата треба да утврди во колкав временски период се случувале наводните манипулации, колку студенти биле опфатени и каква била евентуалната финансиска корист од овие активности. Се проверува и начинот на кој биле извршувани измените во електронската евиденција, како и дали постојат траги во системот што би ги потврдиле сомнежите.
Полициската акција е во тек. Повеќе информации за случајот, евентуалните кривични дела и понатамошните постапки се очекуваат по завршувањето на претресите и по целосното документирање на настанот.
Засега нема официјално соопштени детали од надлежните институции за идентитетот на осомничениот, точниот број на опфатени студенти и висината на пронајдените парични средства.