Најголемата криптоберза во светот, Binance, потврди дека во хакерски напад бил украден дигитален имот вреден 6,3 милијарди долари. Од компанијата соопштија дека со помош на партнерски платформи успеале да замрзнат околу половина од украдените средства и најавија дека самостојно ќе ги покријат сите настанати загуби.
Binance will cover all losses.
As a precaution, all deposits and withdrawals are temporarily suspended while our team conducts security checks, freezes funds, and works with law enforcement.
We are working around the clock and will share a full post-mortem once the investigation is complete. Please rely only on official Binance channels for updates.
— Binance (@binance) October 30, 2026
Првичните интерни проверки покажале дека упадот најверојатно започнал преку компромитиран лаптоп на еден од инженерите на компанијата, што му овозможило на напаѓачот неовластено да повлече огромни суми пари.
Компанијата за истражување на сајбер-безбедноста TRM Labs, која во истрагите користи и вештачка интелигенција, го поврза нападот со севернокорејската хакерска група TraderTraitor.
Станува збор за напад што значително ја надмина досегашната рекордна кражба од криптоберзата Bybit во 2025 година, кога беа украдени 1,5 милијарди долари.
„Оваа проценка ја донесуваме со високо ниво на сигурност“, објави TRM Labs во својот извештај, наведувајќи дека повеќе елементи на нападот целосно се совпаѓаат со претходни операции поврзани со режимот во Пјонгјанг, вклучително и нападот врз Bybit.
Главниот аналитичар на TRM Labs, Ари Редборд, изјави за Би-Би-Си дека оваа кражба е „пресвртница“ каква што криптоиндустријата досега не доживеала.
Тој додаде дека напаѓачот сè уште располага со огромен дел од украдените средства, што значи дека потрагата по парите е само на почетокот.
Од Binance не одговорија директно на прашањето на Би-Би-Си за можната поврзаност со Северна Кореја, туку соопштија дека „тесно соработуваат со полицијата за да го потврдат идентитетот на сторителите и да ги изведат пред лицето на правдата“.
Нападот се однесува на глобалната платформа Binance.com, додека од значително помалата подружница Binance.US, која работи исклучиво со корисници во САД, соопштија дека нивниот систем не бил погоден.
Коосновачката и коизвршна директорка на Binance, Ји Хе, на социјалните мрежи им се заблагодари на издавачите на криптовалути кои помогнале во замрзнувањето на дел од средствата.
„Безбедноста е на прво место. Исплатите во моментов се суспендирани додека не потврдиме дека целиот систем е целосно безбеден“, напиша таа.
Во акцијата за спасување на средствата веднаш се вклучиле две големи платформи, Tether и Circle, кои заедно блокирале околу 2,4 милијарди долари поврзани со нападот.
Извршниот директор на Circle, Џереми Алер, потврди дека внимателно ја следат ситуацијата околу Binance и дека замрзнале повеќе од 800 милиони долари во USDC, една од водечките криптовалути врзани за американскиот долар.
Шефот на Tether, Паоло Ардоино, објави дека неговата компанија блокирала околу 1,6 милијарди долари во USDT, нагласувајќи дека заштитата на индустријата и партнерите е нивен апсолутен приоритет.
И World Liberty Financial, криптопроект поврзан со американскиот претседател Доналд Трамп и неговото семејство, потврди дека работи на замрзнување на украдените средства.
Конкурентската криптоберза Coinbase соопшти дека не била цел на никаков упад и дека го следи развојот на настаните.
Неколку независни аналитичари предупредија дека забележале сомнителни трансакции на Binance неколку часа пред компанијата јавно да го потврди безбедносниот пробив.
Binance беше основана во Кина во 2017 година и денес има повеќе од 300 милиони регистрирани корисници ширум светот, иако со години е под засилен надзор на финансиските регулатори во повеќе земји.
Компанијата во 2024 година соопшти дека чува кориснички средства во вредност од повеќе од 160 милијарди долари.
Веста за нападот веднаш го потресе криптопазарот. Цената на биткоинот падна за повеќе од четири проценти, а остар пад забележаа и други водечки криптовалути, меѓу кои етериумот и соланата.