Француските власти воведоа ноќен полициски час во делови од центарот на Париз и во други градови, по немирите и грабежите што избувнаа низ земјата за време на викендот.
Париската полиција вчера соопшти дека полицискиот час ќе важи од 23 до 6 часот наутро на Плоштадот на Републиката, каде што за време на викендот се собираа демонстранти, како и во трговската зона Ле Ал. Во неколку други делови од центарот на градот се забранети непријавени собири.
Footage shows law enforcement officers and deserted streets in Paris as partial curfews take effect in parts of France following weekend demonstrations over soaring prices that escalated into some of the country’s worst street violence in recent years. https://t.co/quqrTl072V
— Al Arabiya English (@AlArabiya_Eng) October 20, 2026
Делумен полициски час, со различни ограничувања за движењето на младите и одржувањето собири, е воведен и во Марсеј, Бордо, Ница и Лион на југот, како и во Лил и други градови на северот на Франција.
Министерот за внатрешни работи Лоран Нуњез, кого опозициските политичари остро го критикуваа поради недоволната подготвеност за немирите, претходно призна дека полицијата во некои градови „ја изгубила контролата“. Нуњез понуди оставка, но претседателот Емануел Макрон одби да ја прифати.
Протестите почнаа минатиот месец, кога учениците и студентите побараа подобри услови во училиштата, но со текот на времето се проширија и на низа други теми. Синдикатите и различни протестни групи за време на викендот го зголемија бројот на учесници. Според официјалните податоци, приведени се повеќе од 2.500 лица.
По вчерашниот кризен состанок, премиерот Себастијан Лекорну соопшти дека локалните градоначалници ќе добијат овластувања да воведат полициски час „таму каде што е потребно“. Тој не прецизираше во кои градови ќе важи мерката.
Лекорну не ја исклучи ниту можноста за прогласување вонредна состојба.
French authorities expand overnight curfews beyond Paris to Nice, Lyon and parts of the Gironde department following weekend protests marked by violence and looting https://t.co/tsuAtO8r2l https://t.co/lLCdFSkc1w
— Anadolu English (@anadoluagency) October 20, 2026
Тој најави дека владата ќе обезбеди средства за обнова на подрачјата погодени од немирите, а трошоците ќе им бидат наплатени на одговорните за насилството.
„Ќе биде донесен закон со кој ќе најдеме начин оние што оштетиле имот да платат за тоа“, изјави Лекорну.
Тој најави и делумен фонд за надоместување на платите на работниците кои не можеле да работат поради немирите и грабежите.
Нуњез изјави дека 200 истражители ги анализираат снимките од надзорните камери со цел да ги идентификуваат можните организатори на немирите.
Министерот во неделата повторно понудил оставка, но Макрон ја одбил „поради потребата од континуитет во командувањето со силите задолжени за спроведување на законот“, соопшти Елисејската палата.
Во соопштението се наведува дека Нуњез мора да биде транспарентен во врска со она што Макрон го нарекол „пропусти во разузнавачката работа и предвидувањето на настаните“.
„Повеќе од 2.000 продавници и други бизниси беа директно погодени од насилството за време на викендот“, изјави Ален Ди Кресченцо, претседател на француската мрежа на стопански и индустриски комори (CCI).
Тој додаде дека материјалната штета од немирите се проценува на „стотици милиони евра“.
Жан-Лук Шовен, претседател на локалната стопанска и индустриска комора во Марсеј, за Би-Би-Си изјави дека многу сопственици на продавници во градот се наоѓаат во „голема неволја“ и стравуваат за опстанокот на своите бизниси.
Двајца француски министри изјавија дека украдената стока се појавила во огласи на одредени интернет-платформи за продажба.
Портпаролот на платформата „Винтед“ соопшти дека продажбата на украдена стока и побарувачката за таква стока се „строго забранети“.
„Уште од овој викенд, нашите тимови презедоа итни мерки за идентификување и отстранување на огласите поврзани со грабежите, а го засиливме и надзорот над сомнителните огласи“, соопшти компанијата.
За време на викендот околу 550.000 демонстранти излегоа на улиците поради растот на цените на горивата, трошоците за живот и влошувањето на јавните услуги, вклучително и образованието.
Групи демонстранти, од кои некои биле облечени во црно и носеле маски и фантомки, палеа автомобили и згради и ограбуваа продавници во Париз, Марсеј и други градови и помали населени места.
Во централниот француски град Лимож, градското собрание од 19 век беше тешко оштетено во пожар што го подметнале демонстранти во саботата. Додека огнот се ширел, се урнале часовник-кулата и покривот на зградата.
Американската амбасада во Франција издаде предупредување до своите државјани и ги советуваше да ги избегнуваат подрачјата погодени од неодамнешните протести. На граѓаните им беше препорачано да бидат внимателни ако се најдат во близина на големи собири.
Слични предупредувања издадоа и Кина и Германија.
Одредени политичари ја обвинија крајно левичарската партија „Непокорена Франција“ за поттикнување на насилството.
Лекорну на претходната прес-конференција изјави дека некои групи „сакаат да предизвикаат хаос во земјата во пресрет на претседателските избори“.
Лидерот на партијата, Жан-Лик Меланшон, кој ќе се кандидира на претседателските избори следната година, му одговори на премиерот со повик да ги „докаже обвинувањата“ или да се „извини, да замолчи и да престане да поттикнува немири“.