Цените на акциите на повеќето азиски берзи денес пораснаа, додека вредноста на еврото во однос на доларот падна на најниско ниво во последните 17 месеци, бидејќи инвеститорите стравуваат поради политичката и фискалната ситуација во Франција.
Индексот на MSCI за азиско-пацифичките акции порасна за 0,2 отсто во 7 часот наутро, по падот од повеќе од 1 отсто минатата недела.
Цените на акциите во Австралија, Индија и Јапонија утринава пораснаа меѓу 0,1 и 2,2 отсто. Во Хонг Конг забележан е благ пад, додека во Кина и Јужна Кореја не се работи поради празници, пренесува tportal.
Азиските инвеститори беа охрабрени од растот на цените на Волстрит во петокот, по објавувањето на извештајот кој покажа дека американскиот пазар на труд слабее.
Имено, во САД бројот на работни места во септември се зголеми за само 29.000, додека аналитичарите очекуваа околу 90.000. Истовремено, ревидираните податоци покажаа дека во претходните месеци биле отворени значително помалку работни места отколку што првично беше објавено.
Тоа се лоши вести бидејќи укажуваат на слабост на пазарот на труд и на економијата, но токму тие слабости им даваат надеж на инвеститорите дека ФЕД (Американските федерални резерви) нема да брза со натамошно зголемување на каматните стапки.
Пазарот сега проценува дека постои помалку од 25 отсто шанса ФЕД дополнително да ги зголеми каматните стапки на состанокот кон крајот на октомври, додека пред една недела тие шанси изнесуваа речиси 70 отсто.
Инаку, на пазарите владее претпазливост бидејќи кризата на Блискиот Исток не стивнува, па теснецот Хормуз – клучниот премин за извоз на нафта од тој регион – е сè уште практично затворен.
И покрај тоа, цените на нафтата паднаа бидејќи податоците покажаа дека извозот на нафта од Блискиот Исток продолжува да расте, а групата Г7 (најразвиените земји) одлучи да ослободи 100 милиони барели сурова нафта и дизел од своите резерви. На лондонскиот пазар, цената на барел нафта од типот „Брент“ утринава падна за 0,85 отсто, на 101,38 долари, додека на американскиот пазар цената на барелот се намали за 1,27 отсто, на 89,95 долари.