Барселона го одреди напаѓачот на Интер, Лаутаро Мартинез, како апсолутен приоритет во самиот финиш на летниот преоден рок.
Информацијата во пренос во живо на каналот Jijantes FC ја објави добро информираниот шпански новинар Жерар Ромеро, кој нагласи дека германскиот тренер Ханси Флик лично побарал ангажман на аргентинскиот голгетер.
Иако станува збор за исклучително комплициран трансфер поради финансиската состојба на Барселона и краткиот рок, раководството на каталонскиот клуб ќе направи сè за да го реализира спектакуларниот трансфер.
Клучниот детал во целата приказна е тоа што самиот Мартинез наводно ја отворил вратата за можен трансфер на „Камп Ноу“ и изразил желба за нов предизвик во кариерата.
Одличниот 27-годишен напаѓач е капитен на Интер и го предводи нападот на италијанскиот клуб уште од 2018 година, кога пристигна од аргентински Расинг.
Во Милано израсна во еден од најдобрите напаѓачи во светот, а со Интер освои две титули шампион на Италија и стигна до финалето на Лигата на шампионите.
Сепак, Интер неодамна го обезбеди неговиот потпис на нов договор, што значи дека нема да се согласи на продажба на својот најдобар играч без огромна отштета.
Исходот од трансфер-драмата ќе биде познат во наредните денови, кога Барселона ќе се обиде да испрати официјална понуда и да ги задоволи финансиските барања на клубот од „Џузепе Меаца“.