По драматичната победа на Аргентина над Египет (3:2) во осминафиналето на Светското првенство, бурата во фудбалската јавност дополнително ја подигна Жозе Мурињо, кој не штедеше зборови за судењето.
Познатиот португалски стручњак остро ги критикуваше одлуките на судијата и ВАР собата, велејќи дека Египет е сериозно оштетен во финишот од натпреварот.
„Ова е грабеж. Срам за институцијата што го управува светскиот фудбал. Зошто беше разгледана ситуацијата за Аргентина, а на Египет не му беше даден ист третман?“, рече Мурињо.
Египет имаше водство од два гола против актуелниот светски шампион, но Аргентина направи голем пресврт во финишот.
Лионел Меси постигна гол за 2:2 во 83-тата минута, додека Енцо Фернандез длабоко во судиското продолжение им донесе на Аргентинците место меѓу првите осум.
Сепак, резултатот остана во сенка на спорните судиски одлуки. На Египќаните им беше поништен голот на Мостафа Зика по интервенцијата на ВАР, додека останаа без досуден пенал и покрај неколкуте спорни дуели во шеснаесетникот. За време на натпреварот, дури четворица египетски фудбалери завршија со жолти картони, како и тренерот Хосам Хасан.
Моментот кога Хасан направи знак „Х“ со скрстени раце, официјалниот сигнал на ФИФА за пријавување на наводен расистички инцидент и иницирање на антирасистички протокол, привлече посебно внимание. И покрај ова, играта не беше прекината, што предизвика дополнителни контроверзии меѓу навивачите и фудбалските аналитичари.
Изјавите на Мурињо само ја поттикнаа дебатата за квалитетот на судењето на Светското првенство, кое е предмет на сè поголеми критики во последните денови. ФИФА сè уште не ги коментираше обвинувањата на португалскиот селектор, но е јасно дека настаните од натпреварот Египет-Аргентина ќе бидат една од главните теми на ова Светско првенство уште долго време.