Фудбалската репрезентација на Мексико се пласираше во осминафиналето на Светското првенство. Мексико пред своите навивачи во Мексико Сити, на славниот стадион „Ацтека“, го совлада Еквадор со резултат 2-0.
Натпреварот беше одложен за еден час поради невреме, а потоа мексиканскиот „ураган“ ги погоди Еквадорците во првите триесет минути. Тогаш головите за домаќинот ги постигнаа Кињонес и Хименез, со што ја одведоа својата земја меѓу 16-те најдобри во светот.
Противник на Мексиканците, кои сè уште немаат примено ниту еден гол, во осминафиналето ќе им биде подобриот од дуелот меѓу Англија и ДР Конго.
Мексиканците ја „заклучија“ топката во воведните минути од натпреварот, Еквадор беше само „нем набљудувач“, а домаќинот прв се закани преку најмладиот играч на Мундијалот, 17-годишниот Мора. Потоа, во седмата минута, Ромо центрираше од десното крило директно на главата на Раул Хименез, кој ја пропушти првата голема шанса на мечот.
Тимот на селекторот Хавиер Агире продолжи со притисокот. Нов опасен шут од далечина во 15. минута упати разиграниот Мора, но уште еднаш не ја погоди рамката од голот.
А потоа, сосема неочекувано, само две минути подоцна, се стресе стативата од мексиканскиот гол. Јебоа успеа со убав дриблинг да се избори за позиција и да упати удар од 12-13 метри, со што за малку ќе го „оладеше“ стадионот „Ацтека“.
Делириум настана во 22. минута кога Мексиканците поведоа.
„Сомбреросите“ изведоа молскавична акција. Роберто Алварадо успеа со топка зад грбот на одбраната на Еквадор да го пронајде затрчаниот Хулијан Кињонес, а овој од својата половина се спушти директно во шеснаесетникот на ривалот, го исфрли дефанзивецот на ПСЖ, Пачо, и со разорен удар во поблискиот агол ја затресе мрежата на немоќниот Галиндез за 1-0.
Ова беше магична ноќ за Мексико, а рапсодијата на домаќинот продолжи со вториот погодок на истекот на половина час игра.
Голема грешка направи стоперот на Еквадор, Ордоњез, кој под притисок ја испрати топката директно во нозете на Хименез. Напаѓачот на Мексико одигра до Кињонес, кој му ја врати топката со додавање, а центарфорот на англискиот Вулверхемптон испрати проект забивајќи го директно под пречката – 2-0.
Единствената светла точка во тимот на селекторот Бекасесе во првото полувреме беше офанзивецот на Венеција, Јебоа. Тој имаше нова шанса во 40. минута, добро шутираше, а Ранхел со парада уште подобро одбрани.
Домаќинот можеше да замине на полувреме и со големи 3-0 доколку младиот Мора имаше малку повеќе среќа, бидејќи не успеа да ја пренасочи топката во голот по ударот на инспирираниот Хименез.
Уште на стартот од вториот дел, нова прилика за Мексиканците. Се обиде Алварадо, но не погоди.
Еквадорците конечно успеаја да го преместат тежиштето на играта на половината на Мексико, иако и домаќините свесно му ја препуштија иницијативата на ривалот, но од тоа не профитираа многу.
Домаќинот дисциплинирано се бранеше и демнеше прилика преку контранапад да го зададе завршниот удар.
До трет погодок Мексиканците можеа да стигнат по корнер во 67. минута, кога Монтес се обиде двапати по ред, но резултатот не се промени.
На голема шанса во вториот дел Еквадорците чекаа сè до 74. минута, кога капитенот Каиседо со сјајна длабочинска топка го пронајде резервистот Родригез, но изостана подобра завршница за да се преполови негативата.
Во самиот финиш од натпреварот дојде до вербален конфликт меѓу дефанзивецот на Еквадор, Пјер Инкапие, и напаѓачот на Мексико, Сантијаго Хименез. Инкапие со рака ја покри устата и поради тоа доби црвен картон.
Фудбалската репрезентација на Франција без поголеми проблеми се пласираше во осминафиналето на Светското првенство, откако во првата елиминациска рунда на стадионот „Метлајф“ во Њујорк ја надигра селекцијата на Шведска со резултат 3-0.
Иако во воведните 20 минути влегоа прилично бавно, Французите по првата пауза за хидратација уфрлија во повисока брзина и сосема заслужено изборија дуел против Парагвај во Филаделфија.
Најзаслужен за победата на Французите беше двојниот стрелец Килијан Мбапе, кој со вкупно шест голови на турнирот го стигна Лионел Меси.
Иако Французите во овој дуел влегоа како големи фаворити, први се заканија Швеѓаните откако уште во третата минута шутираше Александер Исак.Ударот на голгетерот на Ливерпул ни одблизу не беше толку силен за да го фати во чекор Мајк Мењан, меѓутоа тоа беше јасен наговештај за ориентацијата на Швеѓаните на овој меч.
Швеѓаните во ниска зона подготвено ги дочекаа нападите на Французите, а дисциплината во нивната игра се огледуваше во јасно дефинираните одбранбени задачи и на Виктор Ѓокереш.
Тоа им овозможи сè почесто да излегуваат на половината на ривалот, користејќи го и најмалиот простор што им го оставаа Французите, особено поради многу квалитетната офанзивна линија. Французите дури во 16. минута се заканија кон голманот на Шведска, кој успеа да го сопре ударот на Лукас Дињ, исто како и на Килијан Мбапе во следниот напад.
Првото возбудување беше видено во 20. минута кога Бредли Баркола лесно помина неколку шведски играчи, меѓутоа неговиот удар не беше прецизен. Набргу потоа Мбапе постигна гол, кој беше поништен поради офсајд, иако тоа со голо око беше тешко забележливо.
Следуваше пауза за освежување, по која Французите уфрлија во повисока брзина, сè повеќе стегајќи го обрачот пред голот на ривалот.
Најблиску до водство беа во 32. минута кога Мбапе ја погоди стативата, а веќе во следниот напад шутираше Адриен Рабио, меѓутоа и по обидот на играчот од средниот ред на Милан немаше промена на резултатот. Во 36. минута Мајкл Олисе изведе спектакуларен потег со „ножички“, но топката ја погоди стативата, додека на другата страна малку недостигаше Исак да ја казни утката по остриот центаршут на Еланга.
Четири минути подоцна се обиде Мбапе, но промена на резултатот сè уште немаше, исто како и во финишот на полувремето кога се активираше и Олисе. Асот на Баерн се обиде и во 45. минута, но кога него не го сакаше голот, тоа го поправи Мбапе, носејќи ја Франција во водство на самиот истек на првото полувреме. Фудбалерот на Реал Мадрид по еден корнер круниса одличен индивидуален напад, исполнет со дриблинзи со кои го збуни ривалот и ја испрати топката во мрежата.
До крајот на полувремето Французите ја сочуваа минималната предност, која веќе во 53. минута ја дуплираше Баркола по навремената асистенција на Олисе. На асот на ПСЖ не му беше тешко да постигне гол по исклучителното додавање на Олисе, па Швеѓаните на нешто повеќе од половина час пред крајот на мечот беа на чекор до елиминација.
И покрај сигурната предност, Французите не се откажуваа од трет гол, а беа блиску до него во 61. минута кога шутираше Олисе, меѓутоа голманот на Шведска го одбрани обидот на играчот на Баерн. Четири минути подоцна Олисе повторно беше протагонист во убава шанса за Франција, но Гудмундсон ја исфрли топката во корнер. За Швеѓаните немаше спас во 74. минута кога Мбапе, со својот втор гол на мечот, ја измами одбраната на Шведска, совладувајќи го противничкиот голман за предност од убедливи 3-0.
Во финишот на натпреварот Ѓокереш имаше прилика да ја намали убедливата предност на Франција, но ја погоди само стативата. До крајот на мечот немаше промена на резултатот, па Французите со насмевка на лицата ќе заминат за Филаделфија на мегдан против Парагвај.