Еден од најконтроверзните натпревари на Светското првенство предизвика вистинска бура на социјалните мрежи, откако Австрија и Алжир одиграа 3:3 – резултат што им обезбеди пласман на двете селекции во осминафиналето, а го елиминираше Иран.
Бидејќи натпреварот беше последен во групата Ј, двете репрезентации знаеја дека нерешен резултат им одговара и на двете. Со таков епилог Иран остана без место меѓу најдобрите третопласирани селекции и не успеа да се пласира во нокаут-фазата.
Многумина го поврзаа овој расплет со Светското првенство во 1982 година, кога Западна Германија и Австрија го одиграа озлогласениот натпревар познат како „Срамот во Хихон“, по кој токму Алжир беше елиминиран од турнирот.
Натпреварот понуди вистинска драма. Австрија поведе преку Марко Арнаутовиќ во 28. минута, но Рафик Белгали израмни непосредно пред паузата. Во второто полувреме Марсел Сабицер повторно ги донесе Австријците во водство, а само пет минути подоцна Ријад Марез израмни на 2:2.
По вториот гол долго време немаше вистински возбудувања, а двете репрезентации играа претпазливо, бидејќи нерешениот резултат им обезбедуваше пласман понатаму.
Lmao the Algerians celebrated the last goal of Austria more than their wining goal. pic.twitter.com/SPIdk63cwI
— Chosen (@the_Chosen_212) June 28, 2026
Драмата следуваше во судиското продолжение. Марез во 93. минута постигна втор гол и му донесе водство на Алжир од 3:2, резултат што ја елиминираше Австрија и му отвори врата на Иран за осминафиналето.
Сепак, само неколку моменти подоцна, во 96. минута, Саша Калајџиќ погоди за конечни 3:3 и повторно ја испрати Австрија во елиминациската фаза, а Иран остана без пласман.
Дополнителни сомнежи предизвика фактот што ремито повеќе му одговараше и на Алжир. Со освоениот бод Алжир го избегна дуелот со Шпанија во следната рунда и ќе игра против Швајцарија, која на хартија се смета за полесен противник.
По натпреварот, социјалните мрежи беа преплавени со реакции. Дел од навивачите тврдеа дека мечот изгледал „договорен“, додека други оценија дека станува збор за еден од најнеобичните натпревари во историјата на светските првенства.
И покрај бројните шпекулации, досега нема никакви докази или официјални информации што би укажале дека натпреварот бил наместен.