Чешкиот премиер Андреј Бабиш денес на третата Меѓународна конференција за реконструкција на Украина во Гдањск ги критикуваше првенствено европските лидери за тоа што зборуваат за реконструкција и помагање на Украина во војната со Русија, но тие немаат волја да разговараат за поважната работа – дека повеќе оружје значи повеќе убиства и дека веднаш треба да се договори примирје, а потоа мир.
„Војната не е виртуелна. Таа е застрашувачки реална. Тоа значи уништени куќи. Тоа значи повеќе вдовици, сирачиња. Украина веќе плати ужасна цена. Повеќе оружје значи поголема ескалација и повеќе војна“, рече Бабиш.
Според чешкиот премиер, главната тема на оваа конференција треба да биде како да се заврши војната и да се врати просперитетот.
„Мора да се запрашаме, како може земјата да се обнови кога војната продолжува“, рече Бабиш.
На Бабиш му се придружи и словачкиот премиер Роберт Фицо во обвинувањето на западните лидери дека не сакаат првенствено да зборуваат за мир.
„Последиците од војната се чувствуваат далеку надвор од границите на Украина. Нема алтернатива на почитувањето на меѓународното право. Словачката влада отсекогаш повикувала на повеќе дипломатија. ЕУ треба да покрене мировни иницијативи. Нема воено решение за војната“, рече Фицо. Словачкиот премиер, исто така, предупреди дека колку помалку уништени се, толку полесна ќе биде повоената обнова.
„Ако војната не се запре, изградбата нема да биде можна, а украинските реформи во процесот на европска интеграција ќе бидат потешки“, рече Фицо.