Унгарскиот премиер Петер Маѓар денес ја обвини претходната влада на Виктор Орбан дека, и покрај јавното противење на миграцијата, внатрешно разгледувала планови за воспоставување центар за прием на мигранти, тврдејќи дека „борбата против нелегалната миграција“ била една од најголемите политички измами на претходната администрација.
Maѓар рече дека има документи и записници од 2024 година за кои тврди дека покажуваат дека владата размислувала за повторно отворање на транзитните зони и користење на објекти во Витњед за сместување на мигранти, иако јавно ги негираше таквите планови.
„Прашањето за Витњад е барем исто толку сериозно или дури и посериозно од скандалот со помилувањето на педофилите и ја покажува лажноста на комуникацијата на Фидес на симболичен начин. Фидес отсекогаш бил горд на својата борба против нелегалната миграција и против Брисел, тоа беше основа за нивната кампања против политичките ривали – но неповратно се распадна кога документите излегоа на виделина“, рече Маѓар на прес-конференцијата, пренесува агенцијата МТИ.
Тој изјави дека поради одлуките на Судот на правдата на Европската Унија, Унгарија е казнета со 200 милиони евра, со дополнителни дневни казни, и дека вкупните трошоци, според него, сега достигнуваат околу 1 милијарда евра.
Тој ја обвини претходната влада дека „политички го користи прашањето за миграцијата, а во исто време разгледува решенија што јавно ги негираше“.
Тој, исто така, ја критикуваше комуникацијата на владата, наведувајќи дека некои функционери го отфрлиле постоењето на планови за центри за мигранти.