Победникот на унгарските избори, Петер Маѓар, изјави дека денес имал „исклучително конструктивни и успешни“ разговори со претседателката на Европската комисија, Урсула фон дер Лајен, за замрзнатите европски средства, за кои рече дека наскоро ќе пристигнат во Унгарија.
Комисијата го блокираше пристапот до средствата бидејќи тврдеше дека владата на премиерот во заминување Виктор Орбан ги прекршила стандардите на Европската унија кога станува збор за владеењето на правото.
Некои од замрзнатите средства, како што се 11 милијарди евра од европскиот план за закрепнување од корона вирусот, мора да се повлечат до средината на август или ќе бидат неповратно изгубени.
Маѓар напиша во објава на Фејсбук по средбата со Фон дер Лајен дека ќе се врати во Брисел на крајот на мај за да склучи политички договор за замрзнатите пари.
„Европската унија не наметнува услови што би биле спротивни на интересите на нашата земја“, напиша Маѓар.
По средбата, Фон дер Лајен рече дека имала „многу добар разговор“ со Маѓар.
„Разговаравме за чекорите потребни за отклучување на европските средства наменети за Унгарија, замрзнати поради загриженост за корупција и владеење на правото“, напиша Фон дер Лајен на социјалната платформа X.