Дронови погодија објекти за складирање нафта во пристаништето Салала во Оман, а локалните власти се обидуваат да го изгаснат големиот пожар што избувна по нападот, соопштија регионални и поморски безбедносни извори.
Според достапните информации, погодени се резервоари за гориво во пристаништето, додека нема извештаи за штети на трговски бродови во пристаништето.
Нападот привремено го наруши работењето на пристаништето Салала, еден од најважните логистички и енергетски центри на Арапското Море.
Овој инцидент е дел од поширок бран напади врз енергетската инфраструктура во Персискиот Залив. Иран во последните денови ги таргетира објектите за производство и складирање на енергија во регионот како одговор на нападите на САД и Израел врз ирански цели.
Експертите предупредуваат дека ваквите напади дополнително го зголемуваат ризикот за глобалниот пазар на енергија, бидејќи конфликтот сè повеќе се шири кон клучната нафтена инфраструктура и бродските правци во Заливот.