Унгарската централно-десничарска опозициска партија Тиса го зголеми своето водство пред Фидес на премиерот Виктор Орбан во февруари, покажа денес анкета на „Медијан“, фирма позната по своите точни предвидувања, пред парламентарните избори на 12 април на кои националистичкиот ветеран се кандидира за реизбор.
Орбан, кој е на власт 16 години и планира да остане, првпат се соочува со силен противник на парламентарните избори, а исходот ќе има големи импликации не само за Унгарија, туку и за Европа и нејзините крајно десничарски политички сили.
Според анкета, Фидес губи поддршка, а Тиса добива поддржувачи, и покрај низата мерки што ги објави владата по три години економска стагнација.
Тиса, предводена од поранешниот владин инсајдер Петер Маѓар, ја зголеми својата предност пред Фидес на 20 процентни поени меѓу решителните гласачи, во споредба со предноста од 12 процентни поени во анкетата во јануари, според агенцијата за анкети „Медијан“, чии резултати ги објави веб-страницата hvg.hu.
Партијата на Маѓар, основана во 2024 година, ја доби поддршката од 55 проценти од решителните гласачи, во споредба со 51 процент во јануари.
Поддршката за Фидес се намали за еден месец од 39 на 35 проценти, според анкетата спроведена помеѓу 18 и 23 февруари.
Кога се гледа вкупната популација, анкетата покажа дека Тиса има 42 проценти од гласачите, во споредба со Фидес со 31 процент.
Анкетарите од „Медијан“ рекоа дека Тиса „го надомести изгубениот моментум на есен и повторно е пред Фидес со доверба слична на онаа од минатото лето“.
Освен двете водечки партии, само крајно десничарската партија „Нашата татковина“ (Mi Hazánk) има шанса да влезе во парламентот, со поддршка од шест проценти од решителните гласачи, во споредба со пет проценти во јануари, според „Медијан“. Партиите мора да го поминат прагот од пет проценти за да влезат во парламентот.
Анкетата на „Медијан“ има една од најточните прогнози во Унгарија. Таа точно ја предвиде убедливата победа на Орбан на последните избори пред четири години, иако малку ја прецени поддршката на опозицијата.
Иако повеќето анкети покажуваат дека Тиса води, „Фидес“ посочува на анкети кои сугерираат дека сè уште е на добар пат да победи. Но, противниците на „Фидес“ велат дека тие анкети биле спроведени главно од институти со финансиски или лични врски со владејачката партија.
На предизборниот митинг во Шимег минатата недела, Орбан рече дека анкетите покажуваат дека „Фидес“ може да освои 65 до 70 од 106-те поединечни изборни единици во Унгарија, што е намалување во споредба со 87 пред четири години, но сепак е доволно за да ја задржи власта.
Унгарскиот парламент има 199 пратеници, 93 избрани од партиски листи и 106 директно избрани од изборни единици.