Француската полиција изврши нови апсења како дел од двегодишната истрага за местење натпревари во професионалниот тенис.
Според RMC, уште тројца тенисери беа испрашувани и признаа за кривичните дела за кои се обвинети.
Досега се обвинети седум лица, вклучувајќи тројца француски тенисери, а истрагата продолжува по новите апсења. Се очекува официјални обвиненија да бидат поднесени во наредните недели.
Случајот беше откриен на турнир во Родез, каде што беа евидентирани сомнителни плаќања за обложување поврзани со натпревари во двојки. Потоа, истрагата откри мрежа насочена кон играчи од понизок ранг без спонзори и стабилни приходи, нудејќи им мито за намерно да изгубат делови од натпреварите.
За ова зборуваше и поранешната француска тенисерка Марин Парто, која откри дека ѝ биле понудени 1.000 евра на турнир во Романија, ако го изгуби првиот гем. Таа ја одби понудата, иако, како што вели, таа сума беше поголема од наградата за освојување на турнирот.
Истрагата ја води Централната служба за борба против измами во спортот, која ги следи сомнителните обложувања, паричните текови и комуникациите на осомничените. Местењето натпревари во Франција се смета за сериозно кривично дело, а казните се драстични – најдобар пример е 26-годишниот тенисер Квентин Фолио, кој беше суспендиран до 20 години поради учество во измама.