Лувр ќе ги зголеми цените на билетите за повеќето посетители надвор од Европската Унија за 45 проценти од почетокот на следната година, одлучи одборот на директори на музејот.
Туристите од САД, Велика Британија, Кина и други земји ќе мора да платат 32 евра за влез, а зголемувањето треба да обезбеди милиони евра за планираните реконструкции, пишува Би-Би-Си.
Ова беше одлучено по грабежот во октомври, кога група од четири члена украде накит во вредност од 102 милиони долари. Ревизијата спроведена по инцидентот укажа на застарени безбедносни системи и проблеми со инфраструктурата.
Од 14 јануари, посетителите од земјите надвор од Европската економска зона ќе платат дополнителни 10 евра за влез во музејот, кој минатата година прими речиси девет милиони луѓе, претежно странски туристи,.
Повеќе од 10 проценти од посетителите доаѓаат од САД, а околу шест проценти од Кина.
Музејот со години се соочува со критики за пренатрупаноста, долгите редици и ограничениот капацитет. Францускиот претседател Емануел Макрон и раководството на музејот во јануари објавија мерки за подобрување на искуството на посетителите, вклучувајќи план за преместување на „Мона Лиза“ од Леонардо да Винчи во нов простор за да се намали пренатрупаноста.
Лувр, исто така, планира голема реконструкција на други делови од музејот, како и додавање нови објекти како што се тоалети и ресторан, по цена од стотици милиони евра.
Порано овој месец, грчката галерија за керамика беше затворена поради структурни проблеми.
Истрагата за грабежот откри дека музејот инвестирал повеќе во купувања уметнички дела во последните години отколку во одржување и реставрација.