Синдикатот на земјоделски производители денеска во Струмица реагираше на барањето на конзервната индустрија да и се овозможи безцарински увоз на домати и пиперки од Африка и Азија.
-Синдикатот ги повикува преработувачите на градинарски производи да стопанисуваат во услови на пазарна економија, да разговараат и се договараат со земјоделците кои би го планирале своето производство според потребите на конзервната индустрија како по количини, така и по култури.
Синдикатот е загрижен од одобрувањето на Владата на Република Македонија за безцарински увоз, пред се од причина што пиперките или доматите кои ќе бидат увезени од земјите на Африка и Азија потоа на пазарот ќе се продаваат под ајвар од македонско потекло и долгорочно ќе нанесе штета на македонските земјоделци и нарушување на квалитетот на производите.
За долгорочно надминување на овој проблем, Синдикатот предлага веднаш после завршувањето на сезоната за преработка на црвената пиперка и доматите да се започне со подготовка за следната сезона со договарање на условите и количините за нивните потреби за преработка, рече на денешната прес конференција Ристо Велков, претседател на Сојуз синдикат на земјоделски производители.