Фудбалерите на Ботафого за првпат во клупската историја го освоија Копа Либертадорес откако во бразилското финале со 3:1 го победија Атлетико Минеиро, иако играа со играч помалку од првата минута од натпреварот.
Српскиот тенисер Новак Ѓоковиќ пред почетокот на мечот го внесе пехарот наменет за шампионот на Јужна Америка.
🏟️ Finale di Copa Libertadores:
Novak Djokovic protagonista 🏆 #tennis | #CopaLibertadores | #Djokovic
— Luca Fiorino (@FiorinoLuca) November 30, 2024
Србинот беше специјален гостин на финалето на Копа Либертадорес, а навивачите на двата клуба го поздравија со голем аплауз.
Ѓоковиќ е во Буенос Аирес бидејќи денеска во 17 часот ќе одигра егзибициски меч против Хуан Мартин Дел Потро во главниот град на Аргентина на збогувањео со тениската кариера.
Финалето започна со црвен картон за Ботафого. По само 30 секунди Грегор направи опасен старт, а главниот судија Аргентинецот Факундо Тељо му покажа директен црвен картон.
Клубот од Рио де Жанеиро и со играч помалку до полувремето дојде до предност од два гола. Луис Хенрике го доведе Ботафого во водство во 35. минута, а Алекс Телес од пенал во 44. минута го удвои водството.
Хулк на асистенција на Едуардо Варгас намали во 47. минута, а во осмата минута од судиското надополнување, замената на Ботафого, Жуниор Сантос го постави конечниот резултат и започна големо славје за навивачите на популарната „осамена ѕвезда“ на стадионот „Монументал“ во главниот град на Аргентина.