Украинската партизанска група Атеш утринава соопшти дека саботирала клучна пруга меѓу рускиот град Ростов на Дон и окупираниот украински град Мариупол.
Атеш на социјалните мрежи објави видео за кое тврди дека ја покажува акцијата на нивниот оперативец. Овие тврдења не се независно потврдени.
Како што потсетува Киев Индепендент, Русија почна да гради нови железници за поврзување на Русија со Крим и другите окупирани територии во југоисточна Украина.
Ова е дизајнирано да ја намали зависноста на руската војска од мостот и траектот Керч, кои го поврзуваат источен Крим со руската област Краснодар. Имено, мостот во неколку наврати се покажал како ранлив на украински напади.
Петро Андриушченко, советник на прогонетиот градоначалник на Мариупол, во средината на јуни изјави дека железничката линија меѓу Ростов на Дон и окупираниот украински град е „практично завршена“.
„Ова е една од главните железници во регионот, која ја поврзува Русија со украинскиот регион Доњецк. Активно се користи за транспорт на воена опрема и персонал на фронтот“, објави Атеш на Телеграм.
„Со сите сили ја продолжуваме борбата против окупаторот, а бројот на нашите саботажи ќе се зголемува секој ден“, велат тие.
Атеш тврди дека е активен на окупираните територии на Украина, но и во Русија. Во текот на викендот, партизаните на Атеш тврдеа дека успешно саботирале железничка линија во близина на рускиот град Екатеринбург, запирајќи ги возовите што се користат за транспорт на муниција од Северна Кореја.
Групата, исто така, тврдеше дека успешно се инфилтрирала во руската воздушна база во Воронеж во јуни.