Помеѓу 462.000 и 728.000 руски војници биле убиени, повредени или заробени до средината на јуни, објави The Economist, повикувајќи се на протечени документи на американското Министерство за одбрана. Овие бројки го надминуваат бројот на руски војници кои се подготвуваа за целосна инвазија на Украина во февруари 2022 година.
Загубите на Русија во Украина од 2022 година, исто така, ги надминуваат кумулативните жртви со кои земјата се соочи во воените конфликти од Втората светска војна. Руските независни медиуми Медуза и Медиазон објавија извештај во кој се наведува дека од почетокот на инвазијата на Украина се убиени приближно 120.000 руски војници.
Генералштабот на Украина проценува дека загубите на руската армија на крајот на мај надминале 500.000 луѓе. Во оваа бројка се вклучени и загинатите и ранетите, пишува Киев Индипендент.
Економист наведува дека на секој загинат Русин има тројца или четворица ранети. Меѓу оние кои претрпеа најголеми загуби се Русите на возраст од 35 до 39 години. Во целиот период на инвазијата, според пресметките на The Economist, биле убиени до 27.000 луѓе од оваа возрасна група.
„Најновите проценки сугерираат дека приближно 2 отсто од сите Руси на возраст меѓу 20 и 50 години се убиени или сериозно ранети во Украина од почетокот на војната“, се вели во написот.
Украинскиот претседател Володимир Зеленски на 25 февруари објави дека околу 31.000 украински војници биле убиени во војната. Тоа беше првпат Зеленски јавно да претстави бројка за бројот на загинати украински војници од почетокот на инвазијата во целосен обем.
Русија продолжува да регрутира од 25.000 до 30.000 нови војници месечно, објави Њујорк Тајмс (NYT), цитирајќи американски официјални претставници.