Рускиот претседател Владимир Путин денеска ги предупреди западните земји дека ќе сносат „тешки последици“ доколку и дадат дозвола на Украина да користи западно оружје во нападите на руска територија.
„Претставниците на земјите од НАТО, особено во Европа, особено во малите земји, генерално треба да бидат свесни со што си играат. Тие мора да се сетат на нивните мали територии со многу густо население… Ова е сериозна работа, се разбира, многу внимателно ја следиме“, рече Путин за време на неговата посета на Узбекистан, пренесува ТАСС.
Според него, во случај на употреба на оружје со долг дострел од страна на вооружените сили на Украина, Москва повторно ќе мора да донесе одлука за санитарната зона.
„Сега главните настани во специјалната операција се случуваат околу Харков. Настаните во оваа насока беа испровоцирани од акциите на Западот. Значи тие беа оние кои ги испровоцираа овие настани во оваа насока, мислам дека реков пред шест месеци: ако продолжат да удираат по станбени области на територијата на Руската Федерација, тогаш ќе бидеме принудени да создадеме безбедносна зона.
Тој потсети дека Русија никогаш не одбила да преговара за Украина.
„Секогаш со изненадување гледам на некои гестови на нашите западни пријатели и партнери кои велат дека Русија одбива да преговара, тоа сум го кажал илјада пати, како да немаат уши… Ние не одбиваме, украинската страна јавно oдбиva.
Тој додаде дека Русија е подготвена да го продолжи преговарачкиот процес со Украина, но, како што наведе, не се знае што ќе и биде понудено.
Тој нагласи дека Соединетите Американски Држави се однесуваат како империја, заплашувајќи други земји, а елитите на земјата сакаат да го задржат својот империјален статус.