Секое трето дете на возраст под две години во северниот дел на Газа е акутно неухрането, а населението е во опасност од глад, објави главната агенција на ОН која работи во палестинската енклава.
„Детската неухранетост брзо се шири и достигнува невидени нивоа во Газа“, објави Агенцијата на ОН за помош и работа за палестинските бегалци (UNRWA) на социјалните мрежи.
По повеќе од пет месеци израелска воздушна и копнена кампања во Газа, предизвикана од нападот на Хамас врз Израел на 7 октомври, голем дел од енклавата е во урнатини, при што повеќето од нејзините 2,3 милиони жители се раселени и се соочуваат со голема хуманитарна криза. Болниците во Газа објавија дека децата умираат од неухранетост и дехидрација.
Меѓународниот монитор за безбедност на храната (IPC) се очекува наскоро да извести за степенот на кризата со глад во Газа, откако во декември предупреди дека постои ризик од глад проектиран до мај.
За да може IPC да прогласи глад, најмалку 20 отсто од населението мора да страда од екстремен недостиг на храна, секое трето дете мора да биде акутно неухрането, а две лица на 10.000 луѓе мора да умираат на дневна основа од глад или неухранетост и болести.
Западните земји го повикаа Израел да направи повеќе за да обезбеди помош, а ОН предупредија дека се соочува со „огромни пречки“ како што се затворање на премините, строги проверки, ограничувања на движењето и немири во Газа. Помошта почна да пристигнува во Газа по воздушен и морски пат, но хуманитарните агенции велат дека таа не е замена за снабдување по копно.