Сателитските снимки анализирани од Сателитскиот центар на Обединетите нации покажуваат дека 30 отсто од зградите во Појасот Газа се уништени или оштетени во израелската офанзива во густо населената палестинска енклава.
Во израелскиот напад, започнат како одговор на нападите на милитантите на Хамас во јужен Израел на 7 октомври, загинаа повеќе од 27.000 Палестинци, според здравствените власти во областа под контрола на Хамас.
Воздушните напади и гранатирање збришаа цели населби, вклучително и голем дел од цивилната инфраструктура.
„Неверојатни 69.147 згради, приближно еднакво на 30 отсто од вкупните згради во Газа, беа уништени“, соопшти Сателитскиот центар на Обединетите нации, УНОСАТ.
Се вели дека се уништени 22.131 градба во енклавата, а дополнителни 14.066 се сериозно оштетени, а 32.950 претрпеле умерена штета.
УНОСАТ користеше сателитски фотографии од 6 и 7 јануари, кои ги спореди со претходните, вклучително и оние кои датираат од пред израелската офанзива.
УНОСАТ рече дека регионите Газа Сити и Кан Јунис доживеале најзначајно зголемување на штетата од претходните анализи.
Анализата на УНОСАТ исто така покажа дека во Појасот Газа се уништени 93.800 станбени единици. Околу 1.200 луѓе беа убиени во нападот на Хамас врз Израел, што беше поттик за започнување на офанзивата.