Канцеларијата за медиуми на владата во Газа тврди дека припадниците на официјалните израелски сили во болницата Ал Шифа малтретирале болни, ранети и раселени, а нападнале и дел од медицинскиот персонал.
Според таа институција, израелски војници тепале луѓе во болница и ги принудувале да се соблечат, притоа навредувајќи ги, пренесе Ал Џезира.
– Побараа и медицинските работници да ги напуштат местата, за да ги сослушаат под закана со пиштол, соопштија од Канцеларијата за медиуми.
Се додава дека израелските војници протерале голем број деца и некои пациенти „лишувајќи ги од лекување и оставајќи ги да се соочат со закани од бомбардирање, снајпери и смртоносни дронови“.
Израелските одбранбени сили (ИДФ) рано денеска започнаа напад врз Ал-Шифа, откако го обвинија Хамас дека оперира од тунелите под огромниот болнички комплекс, што милитантната група и болничките службеници постојано го негираа, објави Си-Ен-Ен.
Палестинската милитантна група Хамас тврди дека најголемата болница во Газа, Ал Шифа, сега е под контрола на израелските сили.