Најмалку девет лица загинаа, а 15 се ранети во денешната израелска воена операција во Џенин на Западниот Брег, соопшти палестинското Министерство за здравство.
Израелските одбранбени сили (ИДФ) соопштија дека за време на операцијата, со дрон биле нападнати вооружени жители на бегалски камп во Џенин.
-Жителите им се заканувале на израелските сили пукајќи кон војниците и фрлајќи експлозивни направи. Војниците користеа тешка опрема за идентификување и уништување на десетици скриени експлозивни направи, соопшти ИДФ.
Џенин се смета за упориште на палестинските милитанти. Ситуацијата на Западниот Брег значително се влоши откако започна војната меѓу Израел и исламистичкиот Хамас кој владее со Газа.