Продолжува потрагата по напаѓачот кој уби најмалку 18 и рани 13 лица во масовно пукање што се случи во куглана и бар во градот Левистон во американската сојузна држава Мејн. Ова е најсмртоносното масовно пукање во САД оваа година.
Во моментов околу 350 полицајци трагаат по убиецот.
Роберт Кард, осомничениот за масакрот, е обучен инструктор за огнено оружје и армиски резервист. Поранешните колеги го опишуваат како одличен стрелец. Пушката со која е извршен масакрот е легално купена.
Семејството на Роберт Кардо изјави дека тој неодамна почнал да тврди дека слуша гласови во кугланата и барот, односно дека луѓето од тие места зборуваат за него. Го повикаа да им се предаде на властите. За нападот зборуваше и американскиот претседател Џо Бајден, кој повика на забрана за јуришно оружје.
Вчера при претрес во домот на Роберт Кард била пронајдена порака, објави NBC. Инспекторите сè уште се обидуваат да го утврдат значењето на пораката и како таа потенцијално би можела да помогне во нивното пребарување, додава NBC. Тие не открија повеќе детали за белешката.
Агентите на ФБИ ги пребарале последните познати адреси поврзани со Роберт Кард. Според извори од истрагата, откако агентите на ФБИ ја провериле куќата, истражителите дошле да извршат налог за претрес, барајќи предмети како што се компјутери, белешки, оружје и какви било докази што би можеле да укажат на план за извршување на пукањето.
Кард се соочува со налог за апсење по повеќе точки од обвинението за убиство и се смета за вооружен и опасен, соопшти полицијата. Државните и локалните истражители спроведоа сличен влез и претрес на друга локација, како и претрес на автомобилот на Кард.
Во блискиот Лисабон, истражителите пронајдоа оружје додека пребаруваа напуштен автомобил поврзан со осомничениот, но не е утврдено дали огненото оружје било употребено во престрелката, изјави полициски извор.