Израелската влада денеска соопшти дека тврдењето на Хамас дека групата сакала да ослободи уште двајца заложници од хуманитарни причини, но дека Израел одбил да ги прими, е „пропаганда“.
– Нема да обрнуваме внимание на лажната пропаганда на Хамас – соопштија од кабинетот на израелскиот премиер Бенјамин Нетанјаху, пренесува Ројтерс.
Претходно, портпаролот на вооруженото крило на Хамас, Абу Убаид, изјави дека групата имала намера да ослободи уште двајца заложници поради „хуманитарни причини“, но дека Израел одбил да ги прифати.
Абу Убаида, портпарол на бригадата Из ал-Дин ал-Касам, во кусото соопштение рече дека во петокот го информирал Катар за намерата на Хамас да ги ослободи двете лица.
Во петокот Хамас ослободи двајца американски државјани, мајка и ќерка, „од хуманитарни причини“.
Абу Убаида рече дека ослободувањето е одговор на напорите за посредување на Катар.
Од 7 октомври, Хамас зароби околу 210 луѓе за време на нападот врз Израел.