Околу 18.500 вработени во белгискиот јавен сектор денеска излегоа на улиците во Брисел барајќи подобри работни услови и повисоки плати во своите сектори особено погодени за време на пандемијата Ковид-19.
Штрајкуваат вработени во болници, домашна нега, домови за сместување и згрижување деца.
Вработените во јавниот сектор протестираат за да привлечат внимание на недостигот на персонал и големиот обем на работа, а истовремено бараат подобри работни услови и поголема плата.
Пандемијата на Ковид-19 го влоши веќе постоечкиот недостиг на здравствен персонал, велат синдикатите, додавајќи дека испратиле „неколку предупредувачки сигнали до различни влади и министри, но безуспешно“.
Синдикатите исто така ја осудуваат белгиската Влада што не дава поголема поддршка за социјалниот и здравствениот сектор во буџетот за 2023 година.
Протестите почнаа минатиот декември и имаат за цел да го привлечат вниманието на очигледниот недостиг на персонал, како и на работните услови кои тие ги опишаа како „неодржливи“.
Овие сектори очекуваат зголемување на платите за да можат да привлечат млада и способна работна сила.
Извор: МИА