Жителите на неодамна ослободениот стратешки важен град Херсон во јужна Украина беа принудени да бегаат поради силното руско гранатирање од другата страна на реката Днепар, кон која руските сили се повлекоа пред претстојната украинска контраофанзива.
Кристина Бердински, украинска новинарка, објави дека нејзините роднини побегнале од Херсон по „насилното гранатирање“ на градот синоќа и утринава.
„Москва им се одмаздува на Херсон и неговите жители кои не ја прифатија окупацијата“, кажа таа.
Попладнево пристигнаа нови информации за руското гранатирање на ослободениот Херсон. Гувернерот на Херсон најави дека пациентите се евакуираат од градските болници поради гранатирање.
„Поради постојаното руско гранатирање, ги евакуираме пациентите од болниците во Херсон“, објави на Телеграма Јарослав Јанушевиќ, гувернер на Херсон.
Тој додаде дека децата од регионалната клиничка болница ќе бидат префрлени во Миколаев, додека 100 пациенти од регионалната психијатриска болница во Херсон ќе бидат префрлени во Одеса.