Турскиот претседател Реџеп Таип Ердоган по средбата со генералниот секретар на НАТО, Јенс Столтенберг во Истанбул денеска соопшти дека неговата влада нема да брза да го ратификува приемот на Финска и Шведска во НАТО.
Идните чекори на двете нордиски земји „ќе одредат колку брзо ќе оди процесот на одобрување на трилатералниот меморандум и кога ќе биде склучен“, се вели во соопштението од кабинетот на Ердоган во врска со договорот за пристапување на Финска и Шведска во НАТО.
„Разговаравме за финализирање на членството на Финска и Шведска во НАТО, што ќе ја направи нашата алијанса посилна“, напиша шефот на НАТО на Твитер по средбата со Ердоган.
Турција постави строги услови пред да даде зелено светло за проширувањето на НАТО, вклучително и Шведска и Финска да ја прекинат својата наводна поддршка за терористичките групи и да екстрадираат некои осомничени.
Финска и Шведска ги исполнија условите и треба да им се дозволи да се приклучат на Алијансата, рече Столтенберг во четвртокот на прес-конференција со турскиот министер за надворешни работи Мевлут Чавушоглу.
Со нетрпение очекувам да им посакам добредојде на двете земји како полноправни членки на НАТО во блиска иднина, рече Норвежанецот и најави дека денеска ќе разговара за тоа со турскиот претседател Таип Ердоган.
Чавушоглу беше порезервиран на конференцијата, велејќи дека досегашните чекори што ги презеле двете земји не се задоволителни и дека Анкара сака „конкретна имплементација“.
Турција и Унгарија се единствените преостанати членки на Организацијата на Северноатлантскиот договор кои мора да го ратификуваат пристапувањето на двете нордиски земји кои по руската инвазија на Украина ја напуштија својата политика на воена неутралност и побараа да се приклучат на НАТО.