Одборот на извршни директори на Светската банка одобри 1,49 милијарди долари дополнителна финансиска помош за Украина. Тоа, како помош за исплата на плати на државни службеници и социјални работници.
Со оваа сума, вкупната финансиска помош од Светска банка за Киев, надминува четири милијарди долари.
На 8 март, Светската банка одобри помош од три милијарди, со моментална исплата од 489 милиони, оттогаш исплатени се речиси две милијарди долари, се наведува во нивното соопштение.
Најновото финансирање за Украина овозможено е со гаранции од Велика Британија, Холандија, Литванија, Латвија.
„Проектите на Светска банка во Украина овозможуваат подобрување на работата во јавните служби во области на снабдување со вода, дезинфекции, греење, снабдување со електрична енергија, енергетска ефикасност, патишта, социјална заштита, образование и здравство“, пишува во соопштението на Светската банка.
Потребно е одржување на тие основни служби за да се спречи дополнително влошување на животните услови и сиромаштијата во Украина, според директорот на Светска банка за Источна Европа, Аруп Банерџи.
Тој напомена и дека овозможувањето на функционирањето на Владата ќе биде „темелот на секоја обнова“.
Извор: МИА