Претседателот на Република Србија Александар Вучиќ денеска се сретна со главниот обвинител на Механизмот за меѓународни кривични трибунали Серж Брамерц, кој престојува во Белград како дел од подготовките за поднесување на претстојниот извештај до Советот за безбедност на Обединетите нации, јави дописникот на МИА од Белград.
Како што соопштија од кабинетот на срскиот претседател, Вучиќ повтори дека Србија, и покрај несогласувањата за некои прашања, ќе продолжи да се однесува кон оваа соработка на сериозен и одговорен начин, со акцент на подобрување на регионалната правосудска соработка, бидејќи Србија искрено е посветена да придонесе за помирување во регионот.
Главниот обвинител Брамерц ја поздрави улогата на Србија на полето на регионалните напори во областа на казнувањето на воените злосторства, оценувајќи дека Србија е исклучително транспарентна во размената на обвиненија и информации за истрагите, што во голема мера придонесува за побрзо процесуирање на одредени случаи.
Вучиќ разменил мислења со главниот обвинител Брамерц за можностите да се направат дополнителни напори за што поскоро решавање на проблемот со исчезнатите лица, со што во одреден степен би се растовариле регионалните односи, се наведува во соопштението.
Извор: МИА