Најмалку 75 лица загинаа, 412 се тешко повредени, а 14 се водат како исчезнати во земјотресот со интензитет од 6,6 степени според Рихтеровата скала, што денеска го погоди северозападниот дел на Кина, соопштија локалните власти.
Властите во градот Дингси, во провинцијата Гансу, истакнаа дека повеќе од 21.000 згради се тешко оштетени, а над 1.200 се урнати.
Кинескиот Центар за следење на земјотреси соопшти дека епицентарот на потресот бил на 150 километри западно од местото Беидао, а веднаш по него се регистрирани 371 други, од кои најсилниот бил со интензитет од 5,6 степени.
Американскиот геофизички институт меѓутоа оопшти дека првиот земјотрес бил со интензитет од 5,9 степени според Рихтер, на длабочина од 10 километри под површината на земјата.
– Жртви и повредени има во округот Мин и другите рурални делови на Гансу, изјави Танг Сиаоминг, градоначалникот на Дингси, град од 2,7 милиони жители.
Танг нагласи дека најголема материјална штета е причинета во окрузите Мин и Џанг, каде десетици куќи се оштетени, а снабдувањето со електрична енергија и телефонската мрежа се во прекин.
Спасувачките екипи се обидуваат да најдат преживеани под урнатините, но се стравува дека бројот на жртвите би можел да биде многу поголем.