Сто и десет настани во 29 општини ќе опфати шестиот „Топол културен бран“ што го организира Министерството за култура, за да ги доближи националните остварувања во културата до сите граѓани на државата.
И оваа година манифестацијата ќе се реализира во две етапи – првата од 20-ти до 31 јули и втората од 20-ти до 31 август.
Општините се избрани на конкурсот во мај, а нивниот одѕив со апликации за учество бил голем што го поттикнало Министерството да продолжи со дисперзирањето на културата во летните месеци.
Критериуми за избор на понудените програми биле квалитетот и инфраструктурниот капацитет во општините.
– Во досегашните пет изданија, манифестацијата несомнено ја постигна својата цел, доближувајќи ја културата до сите граѓани на Република Македонија. Интересот секоја година е се поголем. Дисперзирањето на културните содржини низ градовите создаде силен културен импулс, кој ги допира областите на неформалната едукација и презентација на културните вредности кои ги произведуваме како држава. Во изминатите пет изданија успеавме да го збогатиме културното живеење на граѓаните и ја зголемивме нивната свест за културата и нејзините вредности, истакна министерката Елизабета Канческа-Милевска на прес-конференција.
Во 29-те избрани општини ќе гостуваат професионалните театри, Македонската опера и балет, националниот ансамбл „Танец“, концерти на „Синтезис“ и „Љубојна“, фолклорни друштва, проекции на македонски и филмови за деца, рок и поп-концерти, гостувања на естрадни имиња, изложби, поетски вечери.
Министерката ги спомна и голем број други настани од годишната програма кои се одржуваат во јули и август низ Македонија – културните лета во Охрид, Скопје, Прилеп, Битола, Балкански фолклорен фестивал, Галичка свадба, Фестивал на античка драма во Стоби, Струшките вечери на поезијата, Крушево етно-град.
Градоначалницте на Велес, Пробиштип и Дојран, кои денеска присуствуваа на прес-конференцијата, му се заблагодарија на Министерството што со „Топол културен бран“ им го збогатува секојдневието на нивните жители.
Велешкиот градоначалник Славчо Чадиев го најави гостувањето на Театарот за деца и младинци со „Македонска приказна“ и концертот на „Синтезис“ во јулската етапа од манифестацијата, како и гостувањето на КУД од Хрватска, а во август концерт ќе има Кристина Арнаудова, ансамблот „Келтикум“, како и тамбурашки оркестар од збратимениот град Сомбор. Рече дека програмата е избалансирана, со домашни и странски гостувања и со различни жанрови. Потсети и дека е во тек Фестивалот на античка драма во Стоби.
Градоначалниците на Пробиштип и Дојран, Тони Тоневски и Борче Стамов, посочија дека поддршката од државата е особено важна за малите општини. Во јули во Пробиштип ќе гостува „Танец“, а во август ќе има концерти на Миле Кузмановски, „Нокаут“, настапи на Игор Џамбазов и на повеќе диџеи и локални бендови, а на Денот на рударите, 28 август, таму ќе гостува Владо Јаневски.
Дојранскиот градоначалник Стамов истакна дека за нивната општина манифестацијата е значајна не само за жителите, туку и за голем број туристи и заради нив внимаваат во викендите да има културни содржини.
Во рамки на „Топол културен бран“ во Дојран ќе има концерти, театарски гостувања од Струмица (две претстави од НТ „Антон Панов“ и аматерска на Млад градски театар), стендап-комедии и филмска недела на отворена сцена. Концертите на Палменка Трајковска-квартет и на Сашо Гигов-Гиш ќе бидат во специфичниот амбиент на црквата „Св. Илија“.